Fitch Ratings xalqaro reyting agentligi Uzum’ning uzoq muddatli emitent defolt reytingini (IDR) barqaror prognoz bilan “B” dan “B+” ga oshirdi. Agentlik tahlilchilari Uzum’ning bank, fintech va e-commerce yo‘nalishlari o‘rtasidagi sinergiyaning o‘sishi va ekotizimning biznes profilining mustahkamlanishini ta’kidlamoqda.
Qaror asosida Uzum’ning elektron tijorat, to‘lov va bank yo‘nalishlari o‘rtasidagi o‘sib borayotgan sinergiya, shuningdek, so‘nggi yillarda O‘zbekiston moliya tashkilotlari uchun operatsion muhitning yaxshilanishi yotadi. Fitch ma’lumotlariga ko‘ra, ekotizim ichidagi servislarning integratsiyasi barqaror moliyaviy ko‘rsatkichlarni saqlab qolgan holda kompaniyaning biznes profilini mustahkamlaydi: marketpleys, to‘lov va raqamli bank mahsulotlarining uyg‘unligi Uzum’ga yangi mijozlarni jalb qilish va moliyaviy xizmatlarning kirib borishini oshirishga yordam beradi.
Reytingning “B+” darajasiga ko‘tarilishi so‘nggi bir yil ichida Uzum ko‘lami va profili qanchalik o‘zgarganining muhim ko‘rsatkichidir. Biz elektron tijorat, to‘lov va bank servislarini yagona ekotizimga birlashtiramiz, bu yerda mahsulotlar bir-birini to‘ldiradi va foydalanuvchi tajribasini yanada qulaylashtiradi. Biz O‘zbekistonning ham ekotizimining, ham raqamli iqtisodiyotining yanada o‘sishi uchun katta salohiyatni ko‘rmoqdamiz.
“B+” reytingi Fitch tomonidan mamlakat bank sektoriga beriladigan operatsion muhit bahosining yuqori chegarasiga mos keladi. Shu bilan birga, Uzum reytingi ekotizimning o‘z biznes profili va moliyaviy ko‘rsatkichlarini aks ettiradi. Agentlik Uzum foydani saqlab qolgan holda o‘sishda davom etishini va O‘zbekistonning elektron tijorat va fintech bozorlarining sezilarli salohiyati fonida bozordagi mavqeini mustahkamlashni kutmoqda. Hisobotda, shuningdek, Uzum Market butun O‘zbekistonni qamrab olgan o‘z logistika infratuzilmasiga asoslangan mamlakatdagi eng yirik onlayn marketpleys ekanligi qayd etilgan.